Lètra circulèra a la Comunôtâ Culturèla Arpitana

Frâres d’Arpitania,

depués sa nèssance l’A.C.A. (Aliance Culturèla Arpitana) at avu come objet la dèfensa et lo dèvelopament de la lengoua et de la cultura Arpitana. Avouéc lo pou de fôrces disponibles, l’Aliance at, quand mémo, fêt du bon travaly, surtot atot l’utilisacion de la têla internet.
O fôt mèmament dére que la ples pârt de ceti travaly est étâye fêta a nivél individuèl et sovent en pèrfèta solitude. Bien que nos sens convencus que ples important que lo numerô seye la qualitâ des participants, tot-pariér ora est arrevâ lo moment de fére quârque-chousa de més.

Lo consolidament que nos réste a portar en devant passe por três chemin :

ôgmentar noutra densitâ et cohèsion

 multipliar los moments de socialisacion entre los membros de l’Aliance s’engagient a participar a :
rende-vos pèriodicos [ por ègz. : châque doux mês ] a l’ocasion de manifèstacions d’intèrêt por tota l’Arpitania :
fétes des cantons, règ•ions, fedèracions, comenes, etc.
èvènements sportifs ou flokloricos (fêres, rassemblaments por des spèctacllos musicals, tèâtrals etc.)
èvènements d’entèrêt politico-social g•ènèral (dèfensa du méten ambiental, des minoritâs ètniques, lengouistiques etc.)
 organisar u muens una jornâ publica Arpitana châque los doux ans :
por ègzemplo una Jornâ de la Cultura et de la lengoua Arpitana a tenir châque vês a una difèrenta des noutres grantes veles (Èneci, Chambèri, Sion, Losena, Geneva etc.)

ôgmentar noutra prèsence et visibilitâ

 renforciént noutron seto enstitucional ( www.arpitania.eu )
 fôt s’engagiér a lui enveyér totes sôrtes des novèles, por arpitania.eu tot cen que se passe a noutron Payis est entèrèssient, et surtot tot lo mondo est metu u corent des chouses !
 fôt l’enrechiér avouéc tôs noutros travalys, sens avêr vèrgogne de metre u public tot cen que nos fesens.
 l’utilisacion de facebook et de youtube est fôrtament recomandâye et surtot très utila por se fére cognétre a l’èxtèrior. Mas o fôt chèrchiér lo ples possiblo d’utilisar l’Arpitan ècrit ORB por se fére bien comprendre per tôs.
 emporte pas quint seye lo moyen utilisê sur la têla, fôdrat tojorn soulegniér l’apartenance a la ACA, rapelar que la Comunotâ Arpitana ègziste est èssencièl. [Repetita iuvant - les chouses rèpètâyes édont (… et plésont) ]
 se l’on prend pârt a des confèrences, congrès ou totes ôtres manifèstacions similères, est bien s’enscrire ou prendre la parola come apartenent a l’ACA.

ôgmentar los rapôrt et los èchanjos atot les ôtres comunotâs de lengoua minoritèra

 los rapôrts atot les ôtres minoritâs sont fondementals perce que nos donont fôrce et crèdibilitâ. Principâlament les minoritâs de lengoua nèo-latina et naturèlament totes les ôtres :
Payis Catalans
Los Catalans sont la minoritâ la ples fôrta et organisâye d’Eropa, et sont bien disposâ, èventuèlament, a nos reprèsentar u sen des enstitucion Eropèènes.

A noter que l’universitâ catalana at bien volu adoptar lo tèrmo Arpitan u luè de francoprovençal.

Payis Occitan

La situacion en Occitania est una miéta ples complicâye, mas los groupos et los mouvaments de dèfensa de la tèrra et de la lengoua sont brâvament developâs.
Una chousa prôd entèrèssenta est lo « Cercle d’Agermanament Occitano Català [CAOC] » avouéc lo quint noutra Aliance porrêt travalyér franc bien.
Vêre por ègzemplo : http://amicsdarpitania.blogspot.com/

Discors a pârt merete lo Payis Basque, que bien que fôra du conjuènt des lengoues romanes, est un pouent de repèro por son èxpèrience historica sur lo front de la dèfensa de la lengoua et de la cultura.
châque ôtra comunitâ lengouistica et culturèla que come la noutra est en dangiér de via est la benvenua et pôt entretenir rapôrts avouéc nos.

Enfin a concllusion una proposicion concrèta sur lo sujèt de la cohèsion : nos amerians organisar por l’an que vint (printemps/forél 2011) un pèlerinâjo en tèrra de Poulye rencontrar noutros frâres sèparâs. O sarêt très très gent de betar ensemblo un car et alar tôs ensemblo bas lé !
Arpitania lo mês de septembro 2010.

Wikimap : Rèsuma <— Por changiér, cliquar sur ceti titro !

Wikimap : Comentèros et ôtos proposicions <— Por changiér, fére d’ôtros proposicions, cliquar sur ceti titro !